Azken aldian inguruan asko sortu den galdera da hau: Gaur egungo egoera orokorraren aurrean zer zaude, baikor edo
ezkor? Esan nahi da munduaren egoera, gizarteari dagokionez, etorkizuna, teknologia berriak...
Ohartu naiz inguruko joera oso zabaldua dela ezkortasuna, eta ez zait harritzen. Notiziak ikusita, hilketak, gerrak, ekonomia
zailtasunak... Herrigintza baloreen galera nabarmena da, ekintza bolondresak alde batera utzi eta diruaren trukeko lana, edo parranda direla dirudi ekintza nagusiak, antidepresiboak, pornografia... Luze jarraitu ahalko genuke kasuak jartzen, egia
da testuinguru batzuetan egoera oso zaila dela, inoiz baino zailagoa.
Ni berriz ohartu naiz nahiko baikor sentitzen munduarekiko, mugitzen naizen eta sortzen ari naizen inguruak horretan
laguntzen didala uste dut. Gero eta jende gehiago nabaritzen dut bere burua eta ingurukoa zaintzeko gogotsu, elikadura,
kontsumoak... Barne eta kanpo lana egiteko gogotsu ere, ohitura osasuntsuak garatzeko...
Galdetzen diot nire buruari eta ongizate hau munduko beste batzuen kontura egiten dugun, noski bai, eta horretan ere arreta jarri nahi nuke, baina, bidean goazela dirudi. Baikor egoteak ez du esan nahi niretzatdena ongi dagoenik, ezta gutxiago ere, ba
da aurrera jarraitzeko poz bat bezala, bizitzak zentzua duenaren sentipena, misterio baten barruan gaudela baina sakonean
merezi duela, bere poz eta pena guztiekin... tristuratan ere baikor egon ahal dela, minetan... Bizitzeko ditudan aukera
guztiekin, baikor ez egotea ez dela justua iruditzen zait, mugak izan arren, inoiz baino aukeratzeko gaitasun gehiago izateak,
aurrera goazenaren sentsazioa ematen dit.
Gizakiaren ontasunean fedea. Ezkortasunak duguna ez gozatzea ekar dezake, ez baloratzea, bizitza ez bizitzea.
Noski, bakoitzak ditu bere arrazoiak eta egoera gogorren aurrean, oso zaila da baikor izatea, hor ez dut zalantzarik. Ez nuke inozoa izan nahi, denetarik topatu izan dut eta topatuko dut, baina bai sentitu sakonean badagoela zerbait oso polita dena.
Ea nora goazen ba!