Ez, ale honetako azala ez da maketazio arazoa izan, ez eta inprenta arazoa ere. Zuriz utzi dugu hilabete honetako Mailope, bere egoeraren antonimo gisan; izan ere, beltza da Mailoperen egoera. Urte grisak bizi izan ditugu 35 urte hauetan, baina beti beltzetik gertuago, zuritik baino. Zenbat ekimen aldizkari polit honi arnas pixka bat emateko: Mailope korrika, kakaplasta, kontzertuak… Azken urteotan ordea produkzio kostuak ikaragarri igo eta egoera iluntzen joan da, beltzaren paletera iritsi arte. Kitto, Mailoperen zakua hustu da.
Mailope, Araitz-Betelu, Larraun eta Lekunberriko 1600 etxeetara bidaltzen da, doan, hilabetero. “Etxe bat, bazkide bat”, hori zen gure leloa. Ene, hori egia balitz! Gaur egun 251 bazkide ditugu, 251 bazkide zoragarri, baina ez dira nahikoak. Badakigu etxe bakoitzeko bazkide bat lortzea utopia izan litekeela, baina gaur egungoa bikoiztearekin nahikoa genuke egoerari buelta emateko. Banatzen den etxe bakoitzeko, %30eko bazkide kopurua ez da hain utopikoa, ezta?
Eta hemen denok egingo duzuen galdera: zergatik egin bazkide, etxean aldizkaria berdin jasotzen badut? Galdera honi zeuk erantzutea eskatuko dizugu gaur. Zeure buruari galdetzea zer sentitzen duzun aldizkaria postontzian ikusi eta sutondoan zure bizilagunaren elkarrizketa irakurtzen duzunean. Nora jotzen duzun ondoko herrietako ihauterietan zer dagoen jakin nahi duzunean; edo zure etxean itoginak agertu eta iturginaren telefono zenbakia behar duzunean. Zer sentitzen duzun zure seme-alaben irria ikustean, zorion agurretan beren argazkia ikusten dutenean. Informazio hori ez du ETB-ek jasoko, ezta Berriak ere. Ohitu gara Mailope hilabetero etxean muxutruk jasotzen. Eta bihar, Mailoperik ez balego?
Egoera gogorrek, erabaki gogorrak hartzea dakarte: 2 hilabetero argitaratu, zuri beltzera bueltatu, bazkideei soilik banatu… asko dira hartu nahi ez genituzkeen erabakiak. Horregatik, lerro hauek idaztera behartuta sentitu gara, bakoitzaren kontzientzia astintzeko; Mailope maite eta estimatzen baduzu, bazkide egiteko eskatuko dizugu, hurrengo hilabeteetan jasotzen ditugun bazkide kopuruak erabakiko baitu Mailoperen etorkizuna. Baditugu ideia eta proposamen berriak, badugu gogoa eta badugu indarra aurrera jarraitzeko. Ea ba, denon artean gaurko letra zuri-beltzak, koloretsu bihurtzen ditugun!
Mailope Kultur Elkarteko Zuzendaritza taldea