Castellon hasi zinen matematika ikasten eta orain Madrilen jarraitzen duzu...
Bai. Betidanik gustatu zait matematika ikastea. Castelloko Jaume I.a Unibertsitatean Matematika Ingeniaritza Gradua ikasi nuen, eta geroztik, aukera asko izan ditut matematika edo programazio alderdietatik jarraitzeko. Baina matematika, aljebra eta teoremak bereziki asko gustatzen zaizkit, gai horiek lantzeak erakartzen nau. Orain, Madrilen egiten ari naizen masterrean matematika hutsa lantzen jarraituko dut, informatika alde batera utzita.
Atzerrian ere ikasten egon zinen...
Bai, Erasmus programaren barruan, Bremen, Alemaniako iparraldean denboraldi bat igaro nuen. Horrela bertako metodologia desberdina ezagutu eta ikasturte hartako ikasgai batean, nire klase propioak diseinatu eta azaltzen ikasi nuen, izan ere, irakaslearen papera egitea formakuntzaren zati bat baitzen.
Dirudienez, hango metodologia desberdina da; esaterako, gai jakin bat aztertu eta landu behar genuen, eta ondoren, irakasleak ordu bat uzten zuen bakoitzak bere azalpenak emateko.
Badago trikimailurik matematika ikasteko?
Egia esan ez dut trikimailu jakinik ezagutzen. Karrera ikasten hasi nintzenean batxilergoko deribatu eta integralak landuko genituela uste nuen, baina azkenean ikasgaiak oso desberdinak izan ziren. Ikasketa-prozesuan gai asko lantzen dira, eta ez du batere zerikusirik batxilergokoarekin. Gainera, ikasleen erritmoak eta beharretara egokitzeko irakaskuntza metodologia moldatu eta aldatu behar da.
"Matematikaren alderdi teorikoak ikasi eta ongi ezagutzea onuragarria da"
Baina egia da batxilergoan, adibidez, ariketak behin eta berriro lantzea lagungarria iruditu zitzaidala. Ariketa mekanikoak egin eta errepikatzeak asko lagundu ninduen. Gero, jakina, pertsonaren arabera ikasteko modua asko aldatzen da, denok ez dugu modu berean ulertzen eta pentsatzen. Adibidez, nire kasuan, historia ikastea oso zaila iruditzen zait eta matematikan ordea, ariketak egitea eta logika puntu bat bilatzea errazagoa iruditzen zait. Hala ere, praktikatzearen garrantzia azpimarratu nahi dut, eta horretaz gain, pentsatzeko forma logiko bat bilatzea ere lagungarria iruditzen zait.
Garrantzitsua da matematikako kontzeptu desberdinak erlazionatzea?
Bai. Batxilergoan, ariketa egitea da garrantzitsuena, baina unibertsitatean gauzak erlazionatu behar dira, kontzeptuak konektatu, eta logika indartu. Noski, ariketa egiten jarraitzea ere garrantzitsua da, baina teoria eta kontzeptuak ulertzea funtsezkoa da. Azkenean, dena globalki konektatzea benetan onuragarria izan daiteke.
"Unibertsitatean gauzak erlazionatu behar dira, kontzeptuak konektatu, eta logika indartu"
Ikasteko prozesuan zein da gehien errepikatzen den akatsa?
Unibertsitatean adibidez, nire akats tipikoena teoria ez ikastea izan zen. Hori ikasten ez baduzu zailagoa izan daiteke matematika ariketa bat egitea. Beraz, matematikaren alderdi teorikoak ikasi eta ongi ezagutzea onuragarria da, modu horretan ariketa jakin batean aldaketak egin ditzakezulako, gaia ezagutzen duzulako. Memorizatzea baino garrantzitsuagoa da logika ulertzea eta hori ez da batere erraza. Azkenean horrelako akatsak suertatzea oso ohikoa da, baina ikaskideek edo irakasleek beste ikuspegi bat eskaintzen dute eta hori benetan lagungarria izan daiteke.
"Buruketen beste ikuspuntu bat ezagutzea lagungarria da"
Zein garrantzi du matematikak eguneroko bizitzan?
Bizitza arruntean, askotan esaten da kontuak egitea garrantzitsua dela, baina nik neronek egunerokoan ez dut konturik egiten. Hala ere, enpresetan, datuen analisia eta informazioaren optimizazioa oso garrantzitsuak dira. Logistikak, datuen analisia eta optimizazioa geroz eta gehiago erabiltzen dira, eta hor matematikaren laguntza beharrezkoa da. Egia da gehienetan lan hauek ezkutuko lanak direla, agian horrelako betebeharrak ez dira hain nabarmenak, baina enpresetan eta beste sektore batzuetan datuak eta optimizazioa beharrezkoak dira. Gainera, eguneroko arloetan, osasunean adibidez, matematikarekin erlazionatutako ikerketak geroz eta ohikoagoak dira.
Eta etorkizunean?
Datuak eta teknologia geroz eta gehiago erabiltzen dira, gaur egungo munduan hori agerikoa da. Ordenagailuak geroz eta zabalagoak dira eta sare sozialetan, mugikorretan, eta bestelako gailu teknologiko edo hainbat web orrialdetan, datuak etengabe jasotzen dira. Enpresek informazio hori guztia behar dute eta hor matematikaren laguntza ezinbestekoa da. Horren ondorioz, datuak prozesatzea eta optimizatzea garrantzitsua da, eta hori egiteko matematika beharrezkoa da. Informatikan eta datuen zientzian karrera gehiago daude, eta enpresetan gero eta eskari handiagoak egiten dira.
Zer esango zenioke matematika klaseetan zailtasunak dituen ikasle bati?
Nire ustez, matematikan zailtasunak izateak frustrazioa sor dezake. Logika eta kontzeptuak ulertzea garrantzitsua da. Oroitzen naiz batxilergoan ikaskideek eta akademiako irakasleek asko lagundu zidatela hainbat gai hobeto ulertzeko. Izan ere, buruketen beste ikuspuntu bat ezagutzea lagungarria da, besteen ideiak eta azalpenak entzutea beharrezkoa dela pentsatzen dut eta ikaskideekin harremanetan egotea ezinbestekoa da. Gaina, behin eta berriro saiatzea onuragarria izan daiteke, modu horretan ariketa matematikoak garatzeko frustrazioa alde batera utzita.