Gaztetxoenekin hasi zen emanaldia, kantu motz bezain alaiekin, guraso zein entzule guztiei irribarre bat ateraz. Bizpahiru abesti egin zituzten koreografiekin lagundurik eta ondoren helduxeagoen txanda iritsi zen. Hauek, aldi berean talde helduenaren laguntzarekin, abesti bikainak kantatu zituzten, ahots desberdinetara emanaldiari puntu gehigarri bat emanez.
Azkenik, kontzertuari amaiera emateko, musikariek publikoari laguntza eskatu zioten “Isil-isilik” abestia kantatzeko, gure kantu ezagunenetariko bat, eta eliza osoa kantuan eta txaloka jartzea lortu zuten ekitaldiari bukaera biribila emanez.
Kosta zen publikoa handik mugitzea, gustura entzungo baitzituzten beste hiruzpalau kantu. Baina azkenean txalo zaparradaren artean abeslariak eszenatokitik jaitsi eta familia zein lagunen zorionak jasoaz pozik bukatu zuten denek.