‘Odoletan daramat’ izeneko errezital familiarrarekin hasteko, Aratz Etxarri eta Unai Amoztegik –10 urteko gaztetxoek– hasiera bikaina eman zuten. Ondoren, Lasarteko Ixabel eta Amaia Zuaznabar ahizpak igo ziren oholtzara; jarraian, Gasteizko Txema eta Yogui López anaiak (Txalazarata). Amaitzeko, hurrengo guraso eta seme-alabak aritu ziren: Astigarragako Aritz eta Adur Goikoetxea, Lodosako Juan eta Jon Salanueva (Malkoa TX), Donostiako Ibon eta Amets Etxeberria (Etxeberria TX) eta Baigorriko Paxkal eta Mikel Indo.
Bukaera hunkigarria izan zen, Mendian Gora abestiaren bertsio berezia eskaini baitzuten. Hala, azken hilabeteetan zendu diren txalapartariak omendu zituzten: Félix Cortazar, Josu Goiri, Patricio Mikeleiz Pato eta Fernando Langarika.
Egitasmoa Talka elkarteak antolatu zuen, Lekunberriko eta Larraungo udalen, Ondare Kultur Taldearen eta Txalapartarien Elkartearen laguntzarekin. Halaber, Jabier Leozek eta Imanol Ugartek ekimenari jarraipena emateko asmoa dutela azpimarratu dute.