Cederna Garalurko elikadura-dinamizatzaile Marta Barbak Kanal Laburren Hamabostaldiaren berri eman digu gaur irratian. Urriaren 19tik 31ra bitartean, eskualdeko bertako produktuen kontsumoa sustatzeko hainbat ekimen antolatu dituzte: jantoki kolektiboetako eta ostalaritzako sukaldarientzako formakuntzak, Mendialdeko Elikagaiak katalogoaren eguneraketa eta digitalizazioa, eta eskualdeko kanal laburrak ezagutarazteko bideo baten ekoizpena. Ekimen horien bidez, tokiko ekoizleen lana ikusarazi, ekoizleen eta kontsumitzaileen arteko harremana indartu eta bertako elikagaien kontsumoa bultzatu nahi dute.
Bihar, urriaren 29an, katalogo berriaren eta bideoaren aurkezpena eginen dute Lekunberriko Plazaola eraikinean, arratsaldeko 18:30ean, eta bertako produktuak eta eskualdeko ekoizleen lana gertutik ezagutzeko aukera izanen da.
